काठमाडौं । नेकपा एमालेले पूर्वराष्ट्रपति विद्यादेवी भण्डारीलाई पार्टीको वरिष्ठ नेता बनाउने भएको छ ।
बिहीबार बसेको पार्टी सचिवालय बैठकले भण्डारीलाई वरिष्ठ नेता बनाउने निर्णय गरेको छ । केन्द्रीय कमिटीले नाम अनुमोदन गरेसँगै भण्डारी पार्टी वरिष्ठ नेता बन्नेछिन् ।
यसअघि लामो समयसम्म भण्डारीको पार्टी सदस्यता समेत एमालेले रोकेको थियो । गत निर्वाचनमा एमाले लज्जास्पद हारपछि गत जेठमा मात्रै भण्डारीको पार्टी सदस्यता खुलाउने निर्णय भएको थियो ।
त्यसो त एमालेको गत महाधिवेशनमा अध्यक्ष ओलीसँग पराजित भएको ईश्वर पोखरेलसहितका नेताहरुलाई समेत जिम्मेवारी दिइएको छ ।
आजको सचिवालय बैठकले ईश्वर पोखरेलसहित ७ नेताहरुलाई स्थायी कमिटी सदस्यमा मनोनीत गर्ने निर्णय गरेको हो । सचिवालय बैठकले पोखरेलसहित प्रदीप ज्ञवाली, देवराज घिमिरे, शिवमाया तुम्बहाम्फे, लालबाबु पण्डित, थममाया थापा र काशिनाथ अधिकारीलाई स्थायी कमिटी सदस्यमा मनोनीत गर्ने निर्णय गरेको हो ।
उनीहरुको नाम केन्द्रीय कमिटीबाट अनुमोदन हुन भने बाँकी रहेको छ ।
