काठमाडौं । साताको अन्तिम कारोबारको दिन नेपाल स्टक एक्सचेन्ज (नेप्से) परिसूचक सामान्य अंकले घटेको छ । यसदिन नेप्से परिसूचक २ अंकले घटेर २ हजार ६ सय ४९.५१ अंकको बिन्दुमा आएको छ । आज कारोबारमा आएका ८५ कम्पनीको सेयर मूल्य घटेको छ भने १ सय ७० कम्पनीको बढेको छ ।
शुक्रबार नेप्से परिसूचक घटेपनि कारोबार रकम भने बढेको छ । आज ३ अर्ब ९४ करोड ५८ लाख ४ हजार रुपैयाँ बराबरको सेयर कारोबार भएको छ । बिहीबार २ अर्ब ८३ करोड ८२ लाख ७९ हजार रुपैयाँ बराबरको सेयर कारोबार भएको थियो ।
आज सबैभन्दा धेरै कमाउनेमा स्नो रिभर्स लिमिटेड, याम्बालिङ हाइड्रोपावर र टक्सार पिखुवा खोला हाइड्रोपावरका लगानीकर्ता रहेका छन् । यी तीनै कम्पनीको मूल्यमा सकारात्मक सर्किट लागेको छ । स्नो रिभर्सको आइपीओ आजैदेखि दोस्रो बजारमा कारोबार सुरु भएको हो भने याम्बालिङ हाइड्रोपावर र टक्सार पिखुवा खोला हाइड्रोपावरको आइपीओ केही दिन पहिले मात्रै सूचीकृत भएको हो । आज सबैभन्दा धेरै गुमाउनेमा कालिका लघुवित्तका लगानीकर्ताहरु रहेका छन् । यो कम्पनीको सेयर मूल्य १०.७६ प्रतिशतले घटेको छ ।
