काठमाडौं, चैत २ । युवा तथा खेलकुद मन्त्रालयले दशरथ रंगशालामा खेलबाहेकका गतिविधि गर्न नदिन राष्ट्रिय खेलकुद परिषद्लाई निर्देशन दिएको छ । परिषद्लाई दशरथ रंगशालाको मर्मत नहुँदासम्म र रंगशाला सञ्चालनसम्बन्धी मापदण्डसहितको कार्यविधि जारी नहुँदासम्म खेलबाहेक अन्य गतिविधि स्थगित गर्न निर्देशन दिइएको मन्त्रालयले जनाएको छ ।
मन्त्रालयले नेपालमा हुने तय भएको नेपाल र बहराइनबीचको खेल गुणस्तरीय मैदानको अभावमा हुन नसकेको विषयमा दु:ख व्यक्त गरेको छ । फिफा विश्वकप छनोटअन्तर्गत नेपाल र बहराइनबीच हुने भनिएका दुवै खेल दशरथ रंगशालाको नाजुक स्थितिको कारण नेपालमा हुन सकेनन् ।
"...मैदानको नाजुक अवस्थाकै बीच मर्मतसम्भार बिना नै निरन्तर खेलकुदलगायत अन्य गतिविधिहरू भइरहेकोतर्फ यस मन्त्रालयको ध्यानाकर्षण भएको छ । घरेलु मैदानमा खेल्ने खेलाडीको चाहना र राष्ट्रिय टिमलाई घरेलु मैदानमै समर्थन गर्ने नेपाली खेलप्रेमी दर्शकको चाहना हुँदाहुँदै पनि नेपालले आफ्नो घरेलु खेलसमेत बाहिरै खेल्नुपर्ने अवस्था आउनु दुःखद छ," मन्त्रालयले शुक्रबार जारी गरेको विज्ञप्तिमा भनेको छ ।
राष्ट्रिय खेलकुद परिषद्सँग समन्वय गरेर नीतिगत अन्योलताको अन्त्य गर्दै दशरथ रंगशालासहित देशका अन्य रंगशालाको सञ्चालन सम्बन्धमा आवश्यक मापदण्डसहितको कार्यविधि जारी गर्ने र खेल क्यालेन्डर बनाउने प्रक्रिया अगाडि बढिसकेको पनि मन्त्रालयले जनाएको छ ।
