काठमाडौं । लामो दशैं बिदापछि खुलेको धितोपत्र बजारमा पहिलो दिन उतारचढावपूर्ण सुरुवात भएको छ । सोमवार नेपाल स्टक एक्सचेन्ज (नेप्से) परिसूचक ४.३४ अंक (०.१६ प्रतिशत) ले ओरालो लागेर २,६२९.८२ विन्दुमा बन्द भएको छ।
सोमबार बजारमा १०,३४३,७०९ कित्ता सेयर कारोबार हुँदा रु ४ अर्ब २ करोड ४२ लाख १,१६८.०७ रुपैयाँको कुल कारोबार भयो । सोमबार बजार खुल्नासाथ सुरुवाती समयमा परिसूचकमा तीव्र उतारचढाव देखिएको थियो ।
केही समयमै ओरालो लागेको बजार ११:४५ बजे आसपास सुधारिँदै २,६३७ विन्दु नजिक पुगेको थियो । तर, त्यो वृद्धि लामो समय टिक्न सकेन । मध्याह्नपछि बजारमा बिक्रिको चाप बढ्दा नेप्से लगातार घटेर अन्ततः रातोमा बन्द भयो ।
