काठमाडौं । विज्ञान प्रविधि तथा नवप्रवर्तन मन्त्री महावीर पुनले मन्त्रालयका लागि नयाँ र योग्य सचिवको खोजी गरेका छन् ।
हाल मन्त्रालयकी सचिव प्रमिला देवी शाक्य बज्राचार्य आगामी असार १७ गते अनिवार्य अवकाशमा जाँदैछिन् ।
महावीरले सामाजिक सञ्जालमार्फत् विज्ञान र प्रविधिको क्षेत्र बुझेको योग्य सचिव भए सुझाव दिन भनेका हुन् ।
‘ यस मन्त्रालयलाई विज्ञान, प्रविधि, अनुसन्धान तथा नवप्रवर्तन क्षेत्रमा काम गरेको एकदमै अनुभवी, कर्मठ र कार्य सम्पादन गर्न सक्ने सचिव चाहिएको छ । सोको लागि विभिन्न माध्यमबाट योग्य सचिवको खोजी हुँदैछ । यस कार्यमा सहयोगको अपेक्षा राख्दछु,’ उनले भनेका छन् ।
वर्तमान सरकारले मन्त्रालयको संख्या कटौती गर्दै नयाँ मन्त्रालयको स्थापना समेत गरेको छ । महावीरकै चाहना अनुसार विज्ञान, प्रविधि तथा नवप्रवर्तन मन्त्रालयको स्थापना गरेको हो ।
मन्त्री पुनले सामाजिक सञ्जालमा भनेका छन् :
विज्ञान प्रविधि तथा नवप्रवर्तन मन्त्रालयको सचिवज्यूको कार्यकाल सकिएर यही असार १७ गते बुधबारदेखि अवकाश लिँदै हुनुहुन्छ । त्यसैले यस मन्त्रालयलाई विज्ञान, प्रविधि, अनुसन्धान तथा नवप्रवर्तन क्षेत्रमा काम गरेको एकदमै अनुभवी, कर्मठ र कार्य सम्पादन गर्न सक्ने सचिव चाहिएको छ । सोको लागि विभिन्न माध्यमबाट योग्य सचिवको खोजी हुँदैछ । यस कार्यमा सहयोगको अपेक्षा राख्दछु ।
