काठमाण्डौ । सिन्धुलीको घ्याङ्लेख गाउँपालिका–२ स्थित एसबीआई बैंक शाखामा भएको लुटपाटपछि प्रहरीले ठूलो मात्रामा नगद बरामद गरेको छ। लुटेराहरु भाग्दै गरेको अवस्थामा नजिकैको जंगलमा करिब २ करोड १० लाख रुपैयाँ फेला परेको जिल्ला प्रहरी प्रमुख एसपी लालध्वज सुवेदीले जानकारी दिएका छन्।
घटनामा संलग्न ४ जनालाई नगदसहित पक्राउ गरिएको छ। तर, नगद फेला परेको रकमबारे प्रहरी प्रमुख सुवेदीले करिब १ करोड ८० लाख भएको बताए पनि प्रहरी कार्यालयकै सञ्चार शाखाले २ करोड १० लाख भएको दाबी गरेको छ। यसले घटनाबारे दुई फरक विवरण सार्वजनिक भएको देखिन्छ।
प्रहरीका अनुसार लुटेरा समूहले करिब ३ करोड १० लाख रुपैयाँ बैंकबाट लुटेको प्रारम्भिक जानकारी प्राप्त भएको छ। नकाबधारी ६–७ जनाको समूहले बैंकका कर्मचारीलाई नियन्त्रणमा लिएर सुरक्षागार्डलाई आक्रमण गरी गम्भीर घाइते बनाएको थियो।
लुटेराहरु प्रयोग गरेको गाडी र चालकलाई प्रहरीले हिजो राति नै नियन्त्रणमा लिएको छ। सो गाडी काभ्रेको बनेपाबाट ल्याइएको खुलेको छ।
