२० माघ २०८०, शनिबार
काठमाडौँ– एएफसी एसियन कप फुटबलमा दक्षिण कोरिया सेमिफाइनलमा प्रवेश गरेको छ । गएराति कतारको अल वाक्रस्थित कल जानौव रङ्गशालामा भएको खेलमा अष्ट्रेलियालाई २–१ गोलले पराजित गर्दै दक्षिण कोरियाले सेमिफाइनलमा स्थान बनाएको हो ।
खेलमा दक्षिण कोरियाले पछि परेको अवस्था उल्ट्याउँदै जित निकालेको थियो । तर सुरुवातमा दक्षिण कोरियाले अग्रता लिएपनि गोल भने रद्द हुन पुग्यो । खेलको ४१औँ मिनेटमा क्रियाग अलेक्जान्डर गुडविनले गोल गर्दै अष्ट्रेलियालाई अग्रता दिलाएका थिए । तर दक्षिण कोरियाका हि चाङ ह्वाङले गोल गर्दै खेललाई १–१ गोलको बराबरीमा ल्याए । ९० मिनेटको निर्धारित समयमा दुवै टोलीबाट १–१ गोलको बराबरी भएपछि खेल अतिरिक्त समयमा धकेलिएको थियो । अतिरिक्त समयको १०४औँ मिनेटमा दक्षिण कोरियाका सन ह्युङ मिनले गोल गर्दै टोलीलाई २–१ गोलको जित दिलाए ।
दक्षिण कोरियाले अब सेमिफाइनलमा जोर्डन विरुद्ध खेल्ने छ । जोर्डनले शुक्रबार नै ताजिकिस्तान विरुद्ध जित हासिल गर्दै अन्तिम चारमा आफ्नो स्थान सुरक्षित गरेको थियो ।
शनिबार बाँकी दुई क्वाटरफाइनल खेल हुने छन् । साँझ ५:१५ बजे हुने खेलमा इरान र जापान भिड्ने छन् । यस्तै राति ९:१५ बजे घरेलु टोली कतार र उज्बेकिस्तानबीच खेल हुनेछ।
