१५ माघ २०८०, सोमबार
काठमाडौं । नेपाल सेपाक ताक्रो संघको आयोजनामा माघ १७ देखि १९ गते सम्म पाँचौं दक्षिण एसियाली सेपाक ताक्रो च्याम्पियनसिप हुने भएको छ । यो प्रतियोगिता तेस्रो पटक नेपालमा हुन लागेको हो । नेपालले यसअघि सन् २०१३ र २०१८ मा यो प्रतियोगिता आयोजना गरेको थियो ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा हुने प्रतियोगितामा नेपालसहित भारत, बंगलादेश, श्रीलंका र पाकिस्तानको सहभागिता रहनेछ । संघका अध्यक्ष नेत्रप्रसाद गुरुङले भारत उपाधि दवोदार भएपनि नेपालले चुनौती दिने बताए । ‘भारत साविक विजेता भएकाले यस पटकपनि उपाधिको प्रमुख दावेदार हो,’ गुरुङले भने,‘ तर, घरेलु मैदानको फाइदा उठाउँदै नेपाल पनि चुनौली दिन तयार छ ।’
आयोजकको निमन्त्रणामा अन्तर्राष्ट्रिय सेपाक ताक्रो संघका कार्यवाहक अध्यक्ष बुन्चाई लोर्पिपात र अर्न्तराष्ट्रिय सेपाक ताक्रो संघका महासचिव दातो अबदुलहालिम विन कादेर यो प्रतियोगिता अवलोकनका लागि आउने छन् ।
प्रतियोगितामा पाँच स्वर्ण पदकका लागि प्रतिस्पर्धा हुनेछ । जसमा पुरुषतर्फ तीन तथा महिलाहरु दुई इभेन्ट समावेश छन् । प्रतियोगिताको अनुमानित लागत खर्च ३६ लाख ६५ हजार रुपैयाँ छ । जसमा राखेपले २० लाख रुपैयाँ उपलब्ध गराउनेछ । कुनै पनि कम्पनीसँग प्रायोजन सम्झौता नभएको हुँदा बाँकी १६ लाख ६५ हजार रुपैयाँ संघ र आर्थिक सहयोग संकलनबाट खर्च हुनेछ ।
संघले च्याम्पियनसिपमा स्वर्ण पदक जित्ने लक्ष्यका साथ २५ खेलाडीलाई समेट्दै दुई महिनादेखि बन्द प्रशिक्षण गराइरहेको छ । यसैगरी संघका संरक्षक ध्रुबबहादुर गुरुङले आफ्नो जम्नदिनको अवसरमा संघको ट्रस्टमा एक लाख रुपौयाँ जम्मा गर्ने घोषणा गरेका छन् । उनी ७५ वर्षका भए ।
