काठमाडौ, १७ भदौ । अभिनेता तथा महानायक राजेश हमाल बेलायत पुगेका छन् । विदेशमा रहेका नेपालीहरुसँग अन्तरक्रिया गर्न र नेपालीहरुको कथा सुन्न उनी बेलायत गएका हुन् । शनिबार राति लण्डन पुगेका हमाल एक महिना बेलायतमा रहने छन् ।
उनले बेलायत वसाइका क्रममा विभिन्न ठाउँमा फरक पेशा व्यवसायमा संलग्न नेपालीहरुलाई भेट्नेछन् र उनीहरुको कथा सुन्नेछन् । हमालले बेलायतमा रहेका धेरै नेपालीहरुलाई उनीहरुको कार्यक्षेत्रमै गएर भेट्ने र उनीहरुको भोगाइ तथा अनुभवबारे बुझ्ने प्रयास गर्नेछन् ।
महानायक हमाल केही च्यारिटी कार्यक्रममा समेत सहभागि हुने छन् । लगत्तै यही शिलशिलामा उनी युरोपका विभिन्न देशहरु पनि पुग्नेछन् । विदेशमा रहेका नेपालीहरुको कथा सुन्ने र विशेष टेलिभिजन सिरिज ल्याउने उद्घोष गरेका अभिनेता हमालले सोही अभियानको प्रारम्भिक चरणमा बेलायत र यूरोपका विभिन्न देशहरुको भ्रमण गर्न लागेका हुन् ।
उनले विदेशमा बसेर विभिन्न क्षेत्रमा राम्रो सफलता पाएका नेपालीहरुको कथा आम नेपालीमाझ ल्याउनु आवश्यक रहेको र उनीहरुको सकारात्मक कथा धेरैका लागि प्रेरणादायी हुने बताएका छन् । त्यतिमात्रै नभएर उनीहरुसँग भएको अनुभव र दक्षतालाई नेपालसँग जोड्नुपर्ने र त्यसबाट देशले कसरी फाइदा लिने भन्नेतर्फ सोच्नुपर्ने पनि बताएका छन् ।
