काठमाडौं । आज नेपाल स्टक एक्सचेन्ज (नेप्से) परिसूचक सामान्य अंकले बढेको छ । यसदिन नेप्से परिसूचक २.३१ अंकले बढेर २ हजार ५ सय ७४.६५ को बिन्दुमा आएको छ । आज कारोबारमा आएकामध्ये १ सय ४० कम्पनीको सेयर मूल्य बढेको छ भने १ सय २७ कम्पनीको घटेको छ ।
आज नेप्से परिसूचकसँगै कारोबार रकम पनि सामान्य बढेको छ । बिहीबार ३ अर्ब ९३ करोड ५ लाख ६० हजार रुपैयाँभन्दा धेरैको सेयर किनबेच भएको छ । बुधबार ३ अर्ब ७४ करोड ८० लाख ८० हजार रुपैयाँभन्दा धेरैको सेयर कारोबार भएको थियो ।
आजै मात्र लाभांश घोषणा गरेको कुथेली बुखरी स्मल हाइड्रोपावरमा लगानीकर्ताको बढ्दो आकर्षण रहेको छ । आज सबैभन्दा धेरै कमाउनेमा यहि हाइड्रोपावरका लगानीकर्ताहरु रहेका छन् । यस कम्पनीको सेयर मूल्यमा सकारात्मक सकिर्ट लागेको छ । कम्पनीले हाल कायम चुक्ता पूँजीको १८ प्रतिशतका दरले बोनस सेयर र सोको कर प्रयोजनार्थ ०.९४७४ प्रतिशत नगद लाभांश वितरण गर्ने घोषणा गरेको छ ।
