काठमाडाैं । पत्रकार किशोर श्रेष्ठ पक्राउ परेपछि प्रतिनिधिसभाकी उपसभामुख रूबी कुमारी ठाकुरले सामाजिक सञ्जालमार्फत कडा टिप्पणी गरेकी छन् ।
वैयक्तिक गोपनीयतासम्बन्धी कसुरमा श्रेष्ठ पक्राउ परेको समाचार सार्वजनिक भएपछि उपसभामुख ठाकुरले उनलाई लक्षित गर्दै गम्भीर आरोपसहितको स्टाटस लेखेकी हुन् ।
ठाकुरले श्रेष्ठलाई ‘पत्रकारको भेषमा राक्षस’को संज्ञा दिँदै उनले श्रीसा कार्कीलाई आत्महत्या गर्न बाध्य बनाएको र अन्य युवतीलाई समेत आत्महत्या गर्न दुरुत्साहन गरेको आरोप लगाएकी छन्।
उनले सामाजिक सञ्जालमा लेखेकी छन्, ‘यो श्रीसा कार्कीलाई आत्महत्या गराउने र कयौँ युवतीलाई आत्महत्या दुरुत्साहन गर्ने पत्रकारको भेषमा राक्षस नै हो।’ यद्यपि उनले यो पोष्ट अहिले हटाइसकेकी छन् ।
श्रेष्ठलाई बुधबार साँझ ललितपुरस्थित निवासबाट उपत्यका अपराध अनुसन्धान कार्यालय र जिल्ला प्रहरी परिसर काठमाडौंको टोलीले पक्राउ गरेको थियो। उनीविरुद्ध वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा अनुसन्धान भइरहेको प्रहरीले जनाएको छ।
जिल्ला प्रहरी परिसर काठमाडौंका एसएसपी दिलीप घिमिरेका अनुसार श्रेष्ठविरुद्ध एक जना पीडितले उजुरी दिएका छन्। हाल श्रेष्ठलाई जिल्ला प्रहरी परिसर काठमाडौंको हिरासतमा राखिएको छ भने बिहीबार अदालतमा उपस्थित गराउने तयारी गरिएको प्रहरीले जनाएको छ।
