काठमाडौँ । नेपाल आइडल सिजन–२ बाट दर्शकमाझ लोकप्रिय बनेका गायक पवन गिरीको नयाँ गीत ‘मन भारी’ बजारमा आएको छ। बहुप्रतिभाशाली गायक गिरीकै शब्द, संगीत र स्वरमा सजिएको उक्त गीत सोमबार उनको आफ्नै आधिकारिक युट्युब च्यानलमार्फत सार्वजनिक गरिएको हो। प्रेम, मानवीय भावना र सम्बन्धका गहिरा आयामहरूलाई कलात्मक रूपमा समेटिएको यस गीतमा एउटा मन छुने भावुक प्रेमकथालाई संगीतमार्फत प्रस्तुत गरिएको छ।
म्युजिक भिडियोमा चर्चित कलाकार सुनिल थापा र मोडल कबिता न्यौपानेको जीवन्त अभिनय देख्न सकिन्छ। गीतको अर्थपूर्ण एवं भावनात्मक शब्द, मधुर संगीत र कलाकारहरूको उत्कृष्ट अभिनयका कारण ‘मन भारी’ले दर्शक तथा श्रोताको मन जित्ने पूर्ण अपेक्षा गरिएको छ।
