काठमाडौं । नेकपा (एमाले) का अध्यक्ष केपी शर्माओली र सुदूरपश्चिम प्रदेशसभा सांसदहरू बिचको संवाद बिनानिष्कर्ष टुंगिएको छ । दलको नेता फेरबदलको विषयलाई लिएर विवाद उत्पन्न भएपछि अध्यक्ष ओलीले बुधबार सांसदहरूलाई आफ्नो निवास गुन्डुमा बोलाएका थिए ।
झन्डै चार घण्टा चलेको छलफलमा कुनै निष्कर्ष ननिस्किएको उपमहासचिव लेखराज भट्टले जानकारी दिएका छन् । भट्टका अनुसार शुक्रबार फेरि बस्ने गरी छलफल टुंगिएको छ ।
छलफलमा दलका नेता राजेन्द्रसिंह रावलसहित सबै सांसद सहभागी थिए । सुदूरपश्चिमका पूर्वमुख्यमन्त्री रहेका रावलको कार्यशैलीप्रति असन्तुष्टि जनाउँदै नेता फेरबदलको पक्षमा अध्यक्ष ओलीसँग लविङ गरेका थिए ।
आजको बैठकमा दलको नेता फेरबदल गर्ने विषयमा कुनै निर्णय नभएको सन्तोषकुमारी शर्मा थापाले जानकारी दिइन् ।
