काठमाडौँ । गरिमा विकास बैंक लिमिटेडले नेपाल चार्टर्ड एकाउण्टेण्ट्स संघ (एक्यान)मा आबद्ध चार्टर्ड एकाउण्टेन्ट सदस्यहरुलाई विभिन्न कर्जा सुविधा प्रदान गर्ने सम्झौता सम्पन्न गरेको छ।
सम्झौतापत्रमा बैंकतर्फ प्रमुख कार्यकारी अधिकृत माधव प्रसाद उपाध्याय र एक्यानतर्फ अध्यक्ष अनुप नेपालले हस्ताक्षर गरेका थिए ।
सम्झौता अनुसार एक्यानमा आबद्ध सदस्यहरूले न्यूनतम आवश्यक कागजात पूरा गरेर रु. ७५ हजारदेखि रु. ५ लाखसम्मको क्रेडिट कार्ड सुविधा प्राप्त गर्न सक्नेछन्।
साथै, आवश्यक प्रक्रिया पूरा गरेमा बिना धितो रु. १५ लाखसम्मको व्यक्तिगत प्रोफेसनल कर्जा पनि उपलब्ध हुनेछ। त्यसैगरी, बैंकले सदस्यहरुलाई आकर्षक ब्याजदरमा घर कर्जा र सवारी साधन कर्जा पनि उपलब्ध गराउनेछ।
गरिमा विकास बैंक हाल ‘अब आफ्नै घर’ भन्ने नाराका साथ ६.४९ प्रतिशतदेखि घर कर्जा र ५.९९ प्रतिशतदेखि SME तथा व्यवसाय कर्जा प्रवाह गर्दै आएको छ।
बैंकका अनुसार हाल देशभर १२६ शाखा कार्यालय, ५१ एटिएम तथा नविनतम डिजिटल बैंकिङ मार्फत करिब ९ लाख ५० हजार ग्राहकलाई सरल, सुरक्षित र गुणस्तरीय सेवा प्रदान गर्दै आएको छ।
