आइतबार, भदौ १०, २०८०
काठमाडौं । एसिया कप–२०२३ का लागि नेपाली राष्ट्रिय क्रिकेटर सन्दीप लामिछाने भोलि (सोमबार) बिहान ११ः२० को कतार एयरवेजको फ्लाइटबाट पाकिस्तान जाने निश्चित भएको छ । पछिल्लो एक वर्षदेखि १७ वर्षीय एक बालिकालाई बलात्कार गरेको आरोपमा मुद्धा खेपिरहेका सन्दीप सोमबार बिहान पाकिस्तान जाने भएका छन् ।
आइतबार जिल्ला अदालत काठमाडौंमा पेसी हेर्दाहेर्दै नभ्याईनेमा रहेपछि सन्दीप सोमबार जाने भएका हुन् । सन्दीपका वकिल सरोज घिमिरेका अनुसार सन्दीप सोमबार बिहान पाकिस्तान जानेछन् ।
नेपाली क्रिकेट टोली एसिया कप खेल्न मंगलबार राती पाकिस्तान गएको थियो । तर सन्दीप टोलीसँग गएनन् । एसिया कप ३० अगष्ट देखि १७ सेप्टेम्बर सम्म हुनेछ ।
नेपाल, पाकिस्तान र भारत समूह ए मा छन् । समूह ‘बी’ मा बंगलादेश, श्रीलंका र अफगानिस्तान छन् । नेपालले १३ भदौ (३० अगष्ट) मा पाकिस्तानसँग मुल्तानमा खेल्नेछ । नेपालले भदौ १८ (सेप्टेम्बर ४) मा भारतसँग श्रीलंकाको कान्डीमा खेल्नेछ ।
