काठमाडौँ । नेपाली क्रिकेटको बहुप्रतीक्षित प्रतियोगिता नेपाल प्रिमियर लिग (एनपीएल) को तेस्रो संस्करण आज सोमबारदेखि सुरु हुँदैछ। नेपाल क्रिकेट संघ (क्यान) को आयोजनामा हुने प्रतियोगिताको उद्घाटन खेलमा साविक विजेता लुम्बिनी लायन्स र सुदूरपश्चिम रोयल्स आमनेसामने हुँदैछन्।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने उद्घाटन खेल साँझ ५ बजेदेखि सुरु हुनेछ। प्रतियोगिताको फाइनल खेल आगामी नोभेम्बर २१ अर्थात् मंसिर ५ गते हुनेछ ।यसपटकको एनपीएल अघिल्ला दुई संस्करणभन्दा थप आकर्षक र प्रतिस्पर्धात्मक हुने अपेक्षा गरिएको छ। प्रतियोगितामा विश्व क्रिकेटका चर्चित खेलाडीहरूको सहभागिता रहनेछ भने पहिलोपटक डिसिजन रिभ्यु सिस्टम (डीआरएस) प्रविधिसमेत प्रयोग गरिनेछ।
अन्तर्राष्ट्रिय क्रिकेट परिषद् (आईसीसी) बाट आधिकारिक टी–२० मान्यता प्राप्त गरेसँगै एनपीएलको तेस्रो संस्करणले नेपाली फ्रेन्चाइज क्रिकेटमा नयाँ इतिहास रच्ने विश्वास गरिएको छ। यस संस्करणमा खेलाडीहरूले बनाएका रन तथा लिएका विकेट आधिकारिक टी–२० तथ्यांकमा समावेश हुनेछन्।
प्रतियोगितामा काठमाडौं गोर्खाज, विराटनगर किंग्स, जनकपुर बोल्ट्स, चितवन राइनोज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्स गरी आठ टोली सहभागी छन् । यस संस्करणमा अस्ट्रेलियाका डेविड वार्नर, वेस्ट इन्डिजका आन्द्रे रसेल, दक्षिण अफ्रिकाका डेविड मिलर, बंगलादेशका शकिब अल हसनलगायत विश्वप्रसिद्ध क्रिकेटरहरूको सहभागिताले प्रतियोगिताको आकर्षण थप बढाएको छ।
प्रतियोगिताको लिग चरण नोभेम्बर १५ सम्म सञ्चालन हुनेछ। त्यसपछि नोभेम्बर १७ मा पहिलो क्वालिफायर, १८ मा एलिमिनेटर र १९ मा दोस्रो क्वालिफायर खेल हुनेछ । एनपीएलको तेस्रो संस्करणले नेपाली क्रिकेटको अन्तर्राष्ट्रिय पहिचान विस्तार गर्नुका साथै घरेलु खेलाडीलाई विश्वस्तरीय क्रिकेटरसँग प्रतिस्पर्धा गर्ने अवसर प्रदान गर्ने अपेक्षा गरिएको छ।
क्रिकेटप्रेमीहरूको उत्साह र विश्वस्तरीय खेलाडीहरूको उपस्थितिबीच आजदेखि सुरु हुने एनपीएलले आगामी एक महिनासम्म नेपाली खेलकुद क्षेत्रलाई उत्सवमय बनाउने विश्वास गरिएको छ।
विजेताले डेढ करोड पुरस्कार पाउने
तेस्रो संस्करणको नेपाल प्रिमियर लिग ९एनपीएल०को तयारी पूरा भएको छ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा आजदेखि सुरु हुने एनपीएलको सम्पूर्ण तयारी पूरा भएको नेपाल क्रिकेट संघ ९क्यान०ले जानकारी दिएको हो।
तेस्रो संस्करणमा क्यानले ७० करोडको कारोबार हुने आशा राखेको छ । यस संस्करणमा २० करोड आम्दानी हुने अनुमान क्यानको छ । क्यानका अनुसार तेस्रो संस्करणको विजेताले डेढ करोड रुपैयाँ पुरस्कार पाउनेछन्। त्यसैगरी दोस्रो हुनेले ८० लाख, तेस्रो हुनेले ४० लाख र चौथो स्थान प्राप्त गर्ने टिमले ३० लाख पुरस्कार पाउनेछ ।
एनपीएलको बजार मूल्य आठ अर्ब पुग्योः सचिव खड्का
नेपाल क्रिकेट सङ्घ (क्यान) का सचिव पारस खड्काले नेपाल प्रिमियर लिग (एनपिएल) को समग्र बजार मूल्य (मार्केट भ्यालु) करिब ८ सय करोड (८ अर्ब रुपैयाँ) पुगेको दाबी गरेका छन् ।
एनपिएलले नेपाली खेलकुद क्षेत्रमा अभूतपूर्व व्यावसायिक सम्भावना र आर्थिक चहलपहल सिर्जना गरेको उल्लेख गर्दै उनले आइतबार आयोजित पत्रकार सम्मेलनमा यस्तो बताएका हुन् ।
सचिव खड्काका अनुसार फ्रेन्चाइज टोलीहरूको बिक्री, व्यावसायिक प्रायोजन (स्पन्सरसिप), प्रसारण अधिकार तथा अन्य व्यापारिक पक्षहरूलाई समायोजन गर्दा लिगको कुल बजार मूल्याङ्कन यो उचाइमा पुगेको हो ।
एनपिएलले नेपाली क्रिकेटलाई व्यवसायीकरणतर्फ लैजानुका साथै स्वदेशी तथा विदेशी खेलाडी, प्राविधिक र सम्बद्ध संघ-संस्थाका लागि ठूलो आर्थिक अवसर सिर्जना गरेको क्यानको भनाइ छ ।
