काठमाडौं । बैंकिङ प्रणालीमा तरलता बढी भएपछि नेपाल राष्ट्र बैंकले आज ३० अर्ब रुपैयाँ तरलता प्रशोधन गर्ने भएको छ ।
राष्ट्र बैंकले २८ दिनका लागि निक्षेप संकलन उपकरणमार्फत ३० अर्ब रुपैयाँ बैंकिङ प्रणालीबाट खिच्न लागेको हो ।
यसका लागि आज दिउँसो ३ बजेसम्म अनलाइन बिडिङ प्रणालीमार्फत बोलकबोल हुनेछ । बैंक तथा वित्तीय संस्थाले कम्तीमा १० करोड रुपैयाँदेखि आवेदन दिन सक्नेछन् । आवेदन रकम १० करोड रुपैयाँले भाग जाने अंकमा हुनुपर्नेछ ।
निक्षेप संकलनको बोलकबोलमा राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागी हुन पाउनेछन् ।
रकम बाँडफाँड गर्दा बैंक तथा वित्तीय संस्थाले प्रस्ताव गरेको सबैभन्दा कम ब्याजदरलाई पहिलो प्राथमिकता दिइनेछ । त्यसपछि क्रमशः बोलकबोलका आधारमा ३० अर्ब रुपैयाँसम्म रकम बाँडफाँड गरिनेछ ।
समान ब्याजदरमा आएको बोल रकम कुल ३० अर्ब रुपैयाँभन्दा बढी भएमा त्यस्तो रकम अनुपातका आधारमा (प्रोराटा) बाँडफाँड गरिने राष्ट्र बैंकले जनाएको छ ।
यस उपकरणको भुक्तानी मिति असोज ३० गते तोकिएको छ ।
