काठमाडौं- सिद्धार्थ बैंकले नेपाल प्रिमियर लिगलाई लक्षित गर्दै नयाँ ग्राहकका लागि सिद्धार्थ एनपीएल क्रेडिट कार्ड र सिद्धार्थ एनपीएल बचत खाता सार्वजनिक गरेको छ।
बैंकका अनुसार असोज १ गतेदेखि मंसिर २९ गतेसम्म सिद्धार्थ एनपीएल क्रेडिट कार्डका लागि आवेदन दिने ग्राहकले निश्चित सर्त पूरा गरेमा आजीवन निःशुल्क क्रेडिट कार्ड सुविधा पाउनेछन्।
योजनाअन्तर्गत कार्ड जारी गर्दा पहिलो वर्षको वार्षिक शुल्क पूर्ण रूपमा छुट हुनेछ। दोस्रो वर्षदेखि अघिल्लो वर्षमा कम्तीमा तीनवटा क्रेडिट कार्ड कारोबार गर्ने ग्राहकको वार्षिक शुल्क फिर्ता गरिने बैंकले जनाएको छ। यो सुविधा प्राप्त गर्न आवश्यक कारोबार हरेक वर्ष मूल्याङ्कन गरिनेछ।
त्यस्तै, सिद्धार्थ एनपीएल बचत खाता खोल्ने ग्राहकले विशेष डिजाइनको डेबिट कार्ड पाउनेछन् भने सुरुवाती सुविधाका रूपमा ५०० पुरस्कार अंक प्राप्त गर्नेछन्।
डेबिट कार्ड र बचत खातासम्बन्धी दुवै सेवा लिने ग्राहकले प्रारम्भिक सदस्यता लिँदा एकमुष्ट ५०० रुपैयाँ वार्षिक शुल्क तिरेर संयुक्त प्याकेजका रूपमा सेवा लिन सक्ने बैंकले जनाएको छ।
असोज १ देखि कात्तिक ३० गतेसम्म सञ्चालन हुने अभियानमा सिद्धार्थ एनपीएल बचत खातावालाले विभिन्न पुरस्कार तथा नेपाल प्रिमियर लिगसँग सम्बन्धित अनुभव प्राप्त गर्ने अवसर पाउनेछन्।
अभियान अवधिमा सबैभन्दा बढी पुरस्कार अंक प्राप्त गर्ने २० जना ग्राहकले विशेष सिद्धार्थ एनपीएल उपहार पाउनेछन्। सबैभन्दा बढी पुरस्कार अंक प्राप्त गर्ने एक जना ग्राहकले नेपाल प्रिमियर लिगसम्बन्धी भिडियोमा सहभागी हुने अवसर पाउनेछन्।
त्यस्तै, अभियान अवधिमा सबैभन्दा बढी पुरस्कार अंकबाट निश्चित लक्ष्य पूरा गर्ने पाँच जना ग्राहकले जनही दुईवटा नेपाल प्रिमियर लिग खेलको टिकट पाउनेछन्।
सबैभन्दा उच्च पुरस्कार विजेता अंक प्राप्त गर्ने एक जना ग्राहकले नेपाल प्रिमियर लिगको सेमिफाइनल खेलमा ‘खेलाडी अफ द म्याच’ पुरस्कार प्रदान गर्ने अवसरसमेत पाउने बैंकले जनाएको छ।
बैंकका अनुसार पुरस्कार विजेता अंक अभियान अवधिमा प्राप्त गरिएको कुल पुरस्कार अंक र प्रयोग गरिएको कुल पुरस्कार अंकको आधारमा निर्धारण गरिनेछ।
योजनासम्बन्धी थप जानकारीका लागि बैंकको २४ घण्टा सञ्चालनमा रहने ग्राहक सेवा केन्द्र ‘सिद्धार्थ केयर’ मा सम्पर्क गर्न सकिने बैंकले जनाएको छ।
