काठमाडौं । नेपाली कम्युनिस्ट पार्टीका नेता झलनाथ खनालले नेपालले एक–चीन नीतिप्रति आफ्नो प्रतिबद्धता कायम राख्नुपर्ने बताएका छन् ।
काठमाडौंमा आयोजित एक कार्यक्रममा बोल्दै खनालले नेपालको भूमि चीन र उसका वैध सुरक्षा हितविरुद्ध हुने कुनै पनि गतिविधिका लागि प्रयोग हुन नदिनुपर्ने बताए । नेपाल–चीन सम्बन्ध आपसी विश्वास, सार्वभौमिकताको सम्मान र एकअर्काका मूलभूत चासोप्रतिको संवेदनशीलतामा आधारित हुनुपर्ने उनको भनाइ छ ।
परिवर्तनशील अन्तर्राष्ट्रिय परिस्थितिबारे चर्चा गर्दै खनालले चीनको बढ्दो प्रभाव, शाङ्घाई सहयोग संगठनको महत्त्व, डलरमाथिको निर्भरता घटाउने प्रवृत्ति तथा विश्वशक्तिको प्रभाव ग्लोबल साउथतर्फ सर्दै गएको बताए । नेपालले यस्ता परिवर्तनको अध्ययन गरी आफ्नो सार्वभौमिकता र राष्ट्रिय हितअनुकूल रणनीतिक स्थान बनाउनुपर्ने उनले बताए ।
उनले मिलेनियम च्यालेन्ज कर्पोरेसन (एमसीसी) अन्तर्गतका कार्यक्रम अघि बढिरहँदा बेल्ट एन्ड रोड इनिसिएटिभ (बीआरआई) अन्तर्गतका परियोजना कार्यान्वयनमा ढिलाइ भएकोप्रति चिन्ता व्यक्त गरे। पार–हिमालय बहुआयामिक सम्पर्क सञ्जालअन्तर्गत सहमति भएका परियोजना समयमै कार्यान्वयन गर्नुपर्नेमा उनले जोड दिए ।
रेलमार्ग, सडक, सञ्चारलगायत सीमापार पूर्वाधारले नेपालको विकास र आर्थिक एकीकरणमा महत्वपूर्ण भूमिका खेल्ने खनालले बताए। भौतिक तथा डिजिटल सम्पर्क विस्तारले नेपाल–चीनबीच व्यापार, पर्यटन, लगानी र जनस्तरको सम्बन्ध विस्तारमा सहयोग पुग्ने उनको भनाइ छ ।
हालैको आकस्मिक बाढीबारे सार्वजनिक भएका बहसबारे बोल्दै खनालले चीनले अग्रिम सूचना नदिएको भन्ने आरोपलाई आधारहीन दाबीको संज्ञा दिए । विश्वव्यापी तापक्रम वृद्धि र सीमापार पारिस्थितिक जोखिमसँग जोडिएका विपद्लाई नेपालको आन्तरिक समस्याका रूपमा मात्र बुझ्न नहुने उनले बताए ।
नेपालको कार्बन उत्सर्जन अत्यन्त न्यून भए पनि जलवायु परिवर्तनका गम्भीर असर नेपालले भोगिरहेको उल्लेख गर्दै उनले यस्ता विषयमा अन्तर्राष्ट्रिय सहकार्य आवश्यक रहेको बताए ।
खनालले स्वतन्त्र र सन्तुलित विदेश नीति, विस्तारित सम्पर्क सञ्जाल तथा नेपाल र चीनबीच सहमत भएका विकास परियोजनाको समयबद्ध कार्यान्वयनमा जोड दिए ।
