काठमाडौँ । रसुवाको भोटेकोशीमा आएको विनाशकारी बाढीले पक्की पुल बगाएपछि ठप्प बनेको नुवाकोटको देवीघाट क्षेत्रमा नेपाली सेनाले पाँच दिनअघि सुरु गरेको बेलिब्रिज पुल जडानको काम पूरा गरेको छ।
सेनाको टोलीले निरन्तर खटिएर छोटो समयमै पुल जडानको काम सम्पन्न गरेको हो । नयाँ पुल जडान भएसँगै भोलिदेखि पैदलयात्रीका लागि आवतजावत खुला गरिने भएको छ भने पर्सिदेखि सवारीसाधनसमेत सञ्चालनमा आउने भएका छन् ।
भोटेकोशीको बाढीले देवीघाटमा रहेको पक्की पुल बगाएपछि नुवाकोट तथा आसपासका क्षेत्रको यातायात सम्पर्क विच्छेद भएको थियो । वैकल्पिक पुल जडान भएपछि स्थानीयवासी, व्यापारी तथा यात्रुलाई आवतजावतमा सहज हुने भएको छ ।
