काठमाडौं । कोशी प्रदेशका मुख्यमन्त्री हिक्मतकुमार कार्कीले आज सोमबार प्रदेश सभाबाट विश्वासको मत लिँदै छन् । प्रदेश सरकारबाट नेपाली कांग्रेसको बहिर्गमन र नेपाली कम्युनिस्ट पार्टी (नेकपा)को प्रवेशसँगै मुख्यमन्त्री कार्कीले आज विश्वासको मत लिन लागेका हुन् ।
नेपालको संविधानको धारा १६८ को उपधारा (४) तथा कोशी प्रदेश सभा नियमावली, २०७४ को नियम १२८ बमोजिम मुख्यमन्त्री कार्कीले विश्वासको मत लिन लागेका हुन् ।
विश्वासको मत लिनेबारे मुख्यमन्त्री कार्यालयले शुक्रबार नै कोशी प्रदेशसभा सचिवालयलाई औपचारिक जानकारी गराइसकेको छ ।
नयाँ सत्ता समीकरणअनुसार नेकपा एमाले र नेपाली कम्युनिस्ट पार्टीबीच भएको सहमतिअनुसार मुख्यमन्त्री कार्कीले गत सोमबार मन्त्रिपरिषद् हेरफेरगरेका थिए । १७ जना सांसदसहित नेपाली कम्युनिस्ट पार्टी सरकारमा सहभागी भएसँगै विश्वासको मत लिने तयारी गरेका हुन् ।
हाल ९३ सदस्यीय कोशी प्रदेशसभामा एमालेका ४० र नेपाली कम्युनिस्ट पार्टीका १७ गरी कुल ५७ जना प्रदेश सभा सदस्यको स्पष्ट समर्थन कार्कीको पक्षमा छन् ।
कोशी प्रदेशसभामा कांग्रेस २९, राप्रपा सभामुखसहित ५ र जसपाको १ सांसद छन् ।
