काठमाडौं । नेपालमा पब्जी मोबाइलको राष्ट्रियस्तरको प्रतियोगिता ‘एक्सट्रिम २०२६ पीएमएनसी नेपाल फल’ आयोजना हुने भएको छ ।
एक्सट्रिम इनर्जी ड्रिंकले नेपालमा बढ्दै गएको ई–स्पोर्ट्सको लोकप्रियतालाई ध्यानमा राख्दै प्रतियोगिता आयोजना गर्न लागेको हो ।
प्रतियोगिता भदौ ६ र ७ गते काठमाडौंको दशरथ रंगशालास्थित राष्ट्रिय खेलकुद परिषद् (राखेप) को कभर्ड हलमा हुनेछ । दुई दिनसम्म चल्ने प्रतियोगितामा नेपालका उत्कृष्ट पब्जी मोबाइल टोलीले उपाधिका लागि प्रतिस्पर्धा गर्नेछन् ।
प्रतियोगिता ‘रोड टू पीएमजीसी’ अभियानसँग जोडिएको आयोजकले जनाएको छ । यसले नेपालमा पब्जी मोबाइलको प्रतिस्पर्धात्मक वातावरणलाई थप बलियो बनाउने अपेक्षा गरिएको छ ।
प्रतियोगितामा राम्रो प्रदर्शन गर्ने टोली र खेलाडीले अन्तर्राष्ट्रिय प्रतियोगितामा अघि बढ्ने अवसर पाउने आयोजकको विश्वास छ । नेपाली टोलीबीच हुने प्रतिस्पर्धाका कारण ग्रान्ड फाइनललाई ई–स्पोर्ट्सप्रेमीले विशेष चासोका साथ हेर्ने अपेक्षा गरिएको छ ।
एक्सट्रिम इनर्जी ड्रिंकले यसअघि पनि नेपालका विभिन्न खेलकुद तथा मनोरञ्जनका गतिविधिमा सहभागिता जनाउँदै आएको छ । कम्पनीले पछिल्लो समय क्रिकेटलगायत विभिन्न खेलसँग पनि सहकार्य गर्दै आएको छ ।
आयोजकका अनुसार यो प्रतियोगिताले नेपालमा ई–स्पोर्ट्स र पब्जी मोबाइलको प्रतिस्पर्धात्मक गतिविधिलाई थप विस्तार गर्न सहयोग पुग्नेछ ।
