काठमाडौं । लामो समयदेखि रिक्त रहेको नेपाल राष्ट्र बैंकको डेपुटी गभर्नर पदमा दीर्घबहादुर रावल नियुक्त भएका छन् ।
बुधबार बसेको मन्त्रिपरिषद् बैठकले राष्ट्र बैंकका कार्यकारी निर्देशक रावललाई डेपुटी गभर्नर नियुक्त गर्ने निर्णय गरेको हो ।
राष्ट्र बैंकका गभर्नर विश्वनाथ पौडेलको सिफारिसमा रावललाई उक्त जिम्मेवारी दिइएको हो ।
रावल हाल राष्ट्र बैंकको बैंक सुपरीवेक्षण विभागको नेतृत्व गरिरहेका छन् । उनी करिब एक वर्षअघि राष्ट्र बैंकको कार्यकारी निर्देशक भएका थिए ।
यसअघि रावलले सन् २०१९ देखि २०२४ सम्म सम्पत्ति शुद्धीकरण तथा आतंकवादमा वित्तीय लगानीसम्बन्धी विषय हेर्ने फाइनान्सियल इन्टेलिजेन्स युनिटको नेतृत्व गरेका थिए । उनले राष्ट्रिय समन्वय समितिको सदस्य सचिवका रूपमा समेत काम गरिसकेका छन् ।
राष्ट्र बैंक प्रवेश गर्नुअघि रावल नेपाल बैंकमा सहायक प्रबन्धकका रूपमा कार्यरत थिए । राष्ट्र बैंकमा भने उनले आर्थिक अनुसन्धान विभाग तथा बैंक तथा वित्तीय संस्था नियमन विभागबाट आफ्नो सेवा सुरु गरेका थिए ।
शैक्षिक रूपमा अर्थशास्त्रमा स्नातकोत्तर तथा व्यवस्थापनमा एमबीए गरेका रावलले समाजशास्त्रमा समेत स्नातकोत्तर गरेका छन् । उनी हाल काठमाडौं विश्वविद्यालय स्कुल अफ म्यानेजमेन्टमा पीएचडी स्कलरका रूपमा अध्ययनरत छन् ।
बैंकिङ क्षेत्रमा योगदानका लागि रावल सामना बैंकिङ पुरस्कार, २०१२ बाट समेत सम्मानित भएका थिए ।
