काठमाडौं । पाल्पाको तिनाउ गाउँपालिका–३ स्थित सिद्धबाबा सुरुङमार्ग नजिक पहिरो खसेपछि सिद्धार्थ राजमार्ग पूर्ण रूपमा अवरुद्ध भएको छ ।
प्रहरीका अनुसार सुरुङमार्गको पाल्पातर्फ प्रवेश गर्ने स्थानबाट करिब १०० मिटर उत्तरतर्फ सडक माथिबाट पहिरो खसेको हो ।
पहिरो हटाउन प्रहरी चौकी दोभानबाट प्रहरी सहायक निरीक्षकको नेतृत्वमा ट्राफिक प्रहरीसहित पाँच जनाको टोली खटिएको छ । तर, पहिरो खस्ने क्रम जारी रहेकाले अहिले हटाउने काम सुरु भएको छैन ।
पहिरो खस्न रोकिएपछि सडक खुलाउन काम सुरु गरिने प्रहरीले जनाएको छ । पहिरो हटाउन जेसिबी तयारी अवस्थामा राखिएको छ ।
