काभ्रेपलाञ्चोक । काभ्रेपलाञ्चोकको खानीखोला गाउँपालिका–१ स्याउरीथलीमा बोलेरो जिप दुर्घटना हुँदा दुई जनाको मृत्यु भएको छ भने तीन जना गम्भीर घाइते भएका छन् ।
पनौती–तालढुङ्गा भित्री सडकखण्डअन्तर्गत स्याउरीथलीमा आज बिहान नम्बर नखुलेको बोलेरो जिप सडकबाट करिब २०० मिटर तल खसेर दुर्घटना भएको हो ।
दुर्घटनामा जिपमा सवार दुई जनाको घटनास्थलमै मृत्यु भएको जिल्ला प्रहरी कार्यालय काभ्रेले जनाएको छ । मृतकको नामथर र वतन खुल्न सकेको छैन ।
जिल्ला प्रहरी कार्यालय काभ्रेका प्रवक्ता तथा सूचना अधिकारी रबिन विष्टका अनुसार घाइतेको उद्धारका लागि प्रहरी परिचालन गरिएको छ । घाइतेलाई एम्बुलेन्समार्फत बेथानचोक गाउँपालिका–५ कामीडाँडास्थित खेलमैदानसम्म ल्याउने कार्य भइरहेको छ ।
घाइतेको थप उपचारका लागि हेलिकप्टरबाट उद्धार गर्ने तयारी गरिएको भए पनि बाक्लो कुहिरोका कारण हेलिकप्टर तत्काल अवतरण गर्न नसकेको खानीखोला गाउँपालिकाका अध्यक्ष इन्द्रबहादुर तामाङले जानकारी दिए ।
उनका अनुसार कामीडाँडाबाट हेलिकप्टरमार्फत घाइतेलाई थप उपचारका लागि लैजाने प्रयास भइरहेको छ ।
घटनाबारे थप विवरण आउन बाँकी रहेको प्रहरीले जनाएको छ ।
