काठमाडौं । नुवाकोटको शिवपुरी गाउँपालिका–७, गुरुङ गाउँमा शनिबार बिहान रोकिराखेको बस चिप्लिँदा अगाडि रोकिएको माइक्रोबससहित खोलामा खसेको छ ।
प्रहरीका अनुसार दुर्घटनामा पाँच जना गम्भीर घाइते भएका छन् । घाइतेहरूलाई उपचारका लागि काठमाडौंको महाराजगञ्जस्थित त्रिवि शिक्षण अस्पताल पठाइएको छ । घाइतेमध्ये केहीको अवस्था चिन्ताजनक रहेको प्रहरीले जनाएको छ ।
प्रारम्भिक अनुसन्धानअनुसार रोकिराखिएको बसमा ह्वील लक नलगाइएका कारण बस चिप्लिएको हो । बस चिप्लिएर अगाडि रोकिएको माइक्रोबसलाई ठक्कर दिएपछि दुवै सवारीसाधन खोलामा खसेका हुन् ।
दुर्घटनापछि नेपाल प्रहरी, नेपाली सेना र सशस्त्र प्रहरीको संयुक्त टोली घटनास्थलमा परिचालित भई उद्धार कार्यमा जुटेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
