जनकपुरधाम । वरिष्ठ साहित्यकार प्रा.डा.राजेन्द्र विमलको निधन भएको छ । ७९ वर्षीय विमलको गएराति प्रादेशिक अस्पताल जनकपुरमा उपचारका क्रममा निधन भएको हो ।
जनकपुर–१० निवासी विमल घरमै नातिसँग खेलिरहेका बेला अचानक स्वास्थ्यमा समस्या आएपछि अस्पताल भर्ना गरिएको थियो ।
उपचारका क्रममा अक्सिजनको मात्रा घट्दै गएपछि राति करिब १ बजे उनको निधन भएको हो ।
विमलको आजै स्वर्गद्वारीमा अन्त्येष्टि गरिने परिवारले जनाएको छ । अन्तिम श्रद्धाञ्जलीका लागि उनको पार्थिव शरीर अहिले जनकपुर–१० स्थित देवीचोकको निजी निवासमा राखिएको छ ।
लामो समय अध्यापन पेसामा रहेका विमलले विज्ञान विषयमा विद्यावारिधि गरेका थिए । उनले नेपाली, हिन्दी र अंग्रेजी विषयमा स्नातकोत्तरसमेत गरेका थिए ।
