काठमाडौँ । ललितपुरको ग्वार्कोस्थित फ्लाइओभरमा बिहीबार बिहान यात्रुवाहक बस दुर्घटना हुँदा एक जनाको मृत्यु भएको छ भने ६ जना घाइते भएका छन्। दुर्घटनापछि प्रहरीले बस चालकलाई नियन्त्रणमा लिएर घटनाबारे अनुसन्धान अघि बढाएको छ।
जिल्ला प्रहरी परिसर ललितपुरका अनुसार बिहीबार बिहान करिब १०:३० बजे कोटेश्वरबाट ग्वार्कोतर्फ जाँदै गरेको बा२ख ३५९० नम्बरको बस फ्लाइओभरमा ठोक्किँदा दुर्घटना भएको हो । दुर्घटनामा करिब ४० वर्षीया एक महिलाको घटनास्थलमै मृत्यु भएको प्रहरीले जनाएको छ। मृतकको पहिचान खुलाउने प्रक्रिया जारी रहेको छ।
दुर्घटनामा घाइते भएका ६ जनालाई उपचारका लागि ललितपुरस्थित बी एण्ड बी अस्पताल पठाइएको प्रहरीले जनाएको छ। घाइतेहरूको अवस्था सम्बन्धी थप विवरण आउन बाँकी छ।
प्रहरीले बस चालकलाई नियन्त्रणमा लिएर दुर्घटनाको कारणबारे अनुसन्धान सुरु गरेको जनाएको छ ।
