काठमाडौं । युवा फुटबल स्टार लामिन यामालले स्पेनलाई दोस्रोपटक फिफा विश्वकपको फाइनलमा पुर्याउन महत्त्वपूर्ण भूमिका निर्वाह गरेको केही समयपछि बार्सिलोनास्थित उनको घरमा चोरीको प्रयास भएको छ ।
बार्सिलोनाको बाहिरी क्षेत्रमा पर्ने एस्प्लुगेस डे ल्लोब्रेगाटस्थित एउटा घरमा चोरीको प्रयास भएको काटालोनिया क्षेत्रीय प्रहरीका एक प्रवक्ताले पुष्टि गरेका छन् ।
गोपनीयताका कारण प्रहरीले घरधनीको नाम सार्वजनिक गरेको छैन । तर, बार्सिलोनाको दैनिक पत्रिका ला भानगार्डियाले उक्त घर यामालको भएको उल्लेख गरेको अलजजिराले जनाएको छ ।
टाउको र अनुहार ढाक्ने बालाक्लाभा लगाएका दुई व्यक्ति घरको पर्खाल नाघेर भित्र पस्ने प्रयास गरेका थिए । तर, निजी सुरक्षा गार्डले देखेपछि उनीहरू घटनास्थलबाट फरार भएका जनाइएको छ ।
ला भानगार्डियाका अनुसार, उक्त घर पहिले बार्सिलोनाका पूर्वरक्षक जेरार्ड पिके र उनकी पूर्वपत्नी तथा कोलम्बियन गायिका साकिराको स्वामित्वमा रहेकाले पनि चर्चित छ ।
यो घटना बुधबार बिहान भएको हो । त्यसको केही समयअघि मात्र स्पेनले अमेरिकाको टेक्सासमा भएको विश्वकप सेमिफाइनलमा फ्रान्सलाई २–० ले हराउँदै फाइनलमा स्थान सुरक्षित गरेको थियो ।
हालका वर्षमा स्पेनका अरू चर्चित फुटबलर पनि चोरीको घटनाबाट प्रभावित भएका छन् । रियल म्याड्रिडका करिम बेन्जेमा, रोड्रिगो र ड्यानी कार्भाहालका घरमा पनि यसअघि चोरीका घटना सार्वजनिक भएको थियो ।
यसपालि विश्वकपको फाइनलमा स्पेनले आइतबार अर्जेन्टिनासँग उपाधिका निम्ति प्रतिस्पर्धा गर्नेछ ।
