काठमाडौं । नेपाल राष्ट्र बैंकले ३५ अर्ब रुपैयाँबराबरको ‘नेपाल राष्ट्र बैंक ऋणपत्र, २०८४ क’ जारी गरेको छ ।
बैंकको मौद्रिक व्यवस्थापन विभागले मंगलबार (असार १६) सूचना प्रकाशन गर्दै एक वर्ष अवधिका निम्ति यो ऋणपत्र बोलकबोलमार्फत निष्कासन गर्न लागेको हो ।
यो ऋणपत्रको बोलकबोल आज दिउँसो ३ बजेसम्म अनलाइन बिडिङ सिस्टम सफ्टवेयरमार्फत मात्र हुनेछ । ऋणपत्रको निष्कासन पनि गरिने जनाइएको छ ।
यसको साँवा भुक्तानी ०८४ असार १६ गतेका निम्ति तोकिएको छ । ऋणपत्रको ब्याजदर बोलकबोलका माध्यमबाट निर्धारण गरिनेछ । यसरी निर्धारित ब्याजको भुक्तानी अर्धवार्षिक रूपमा गरिने बैंकले जनाएको छ ।
यो ऋणपत्रको बोलकबोलमा राष्ट्र बैंकबाट इजाजतपत्र प्राप्त बैंक तथा वित्तीय संस्था (काउन्टरपार्टी) मात्र सहभागी हुन पाउनेछन् । लगानीकर्ताले न्यूनतम पाँच करोड र अधिकतम पाँच करोड रुपैयाँले भाग जाँदा निःशेष भाग जाने गरी कुल आह्वान रकमसम्म बोल गर्न सक्नेछन् ।
यो ऋणपत्रलाई राष्ट्र बैंक र अरू बैंक तथा वित्तीय संस्थामा धितोका रूपमा प्रयोग गर्न सकिनेछ । यो ऋणपत्रमा गरिएको लगानीलाई अनिवार्य नगद मौज्दात (सीआरआर)मा गणना गर्न पाइने छैन । तर, यसलाई वैधानिक तरलता अनुपात (एसएलआर) र खुद तरल सम्पत्ति अनुपातमा गणना गर्न सकिने सुविधा छ ।
ऋणपत्रको बाँडफाँट गर्दा बोलकबोलको ब्याजदरलाई सानोदेखि ठूलो क्रममा राखी एकल ब्याजदर कायम गरिनेछ । यदि, समान ब्याजदरमा मागभन्दा बढी आवेदन परेमा समानुपातिक रूपमा बाँडफाँट गरिनेछ ।
ऋणपत्र स्वीकृत भएपछि निष्कासन मितिमा सम्बन्धित बैंकको खातामा पर्याप्त मौज्दात नभएमा त्यस्तो संस्थाको बोल रद्द गरिनेछ । साथै, २.५० प्रतिशत जरिवानासहित ६ महिनासम्म खुला बजार कारोबारका कुनै बोलकबोलमा सहभागी हुन नपाउने गरी प्रतिबन्ध लगाइने सूचनामा उल्लेख छ ।
