काठमाडौं । काठमाडौं लगायत देशका विभिन्न स्थानमा वर्षा भइरहेको छ । अझै यो वर्षाले केही समय निरन्तरता पाउने जल तथा मौसम विज्ञान विभागको भनाइ छ ।
‘मोन्था’सँगै अरब सागरमा बनेको न्यूनचापीय प्रणालीको असर रहेकाले वर्षा भइरहेको मौसमविद् गोविन्द झा बताउँछन् । उनका अनुसार आज तुलनात्मक रूपमा कोसी प्रदेशमा सबैभन्दा धेरै वर्षा हुनेछ ।
“आज कोसी प्रदेशमा बढी वर्षा हुनेछ । वाग्मती, मधेस र गण्डकीमा मध्यम वर्षा हुनेछ,” मौसमविद् झा भन्छन्, “कोसी प्रदेशको उच्च पहाडी तथा हिमाली भूभागका थोरै स्थानहरूमा तथा वाग्मती र गण्डकी प्रदेशका उच्च पहाडी तथा हिमाली भूभागका एकदुई स्थानमा हल्का हिमपातको सम्भावना छ ।”
बंगालको खाडीमा विकसित भएको चक्रवात ‘मोन्था’को प्रभाव कम हुँदै जाने र क्रमशः मौसम सुधार हुँदै जाने उनको भनाइ छ । “आज साँझबाट अथवा भोलिबाट नै मौसममा पूरै सुधार हुन्छ र पानी पर्न रोकिएर वर्षा हुन सतप्रतिशत रोकिन्छ भन्ने होइन,” मौसमविद् झा अगाडि थप्छन्, “मोन्थासँगै न्यूनचापीय प्रणालीले पनि जलवाष्पयुक्त हावा फालिरहेकाले पानी परिरहेको छ ।”
मोन्था र न्यून चापीय प्रणालीको प्रभाव कम हुँदै गएपछि त्यसकै अनुपातमा मौसममा पनि क्रमिक सुधार हुने उनी प्रष्ट पार्छन् ।
काठमाडौंमा आज पनि वर्षा हुने उनको भनाइ छ । “काठमाडौंमा आज पनि वर्षा हुनेछ । अपराह्नपछि केही कम भने हुनेछ,” मौसमविद् झा भन्छन्, “हिजोको जस्तो आज काठमाडौंमा वर्षा हुने छैन । तर, वर्षा भने हुन्छ । अपराह्नपछि केही कम हुन्छ । केही समय पानी पर्ने, रोकिने र फेरि पर्ने हुन्छ ।”
काठमाडौंलगायत स्थानमा अरब सागरमा बनेको न्यूनचापीय प्रणालीको प्रभाव परेको छ, जसका कारण वर्षा भइरहेको उनले जानकारी दिए ।
भोलिबाट भने काठमाडौंमा मौसम केही सफा हुने उनी बताउँछन् । “भोलि भने काठमाडौंमा वर्षाको सम्भावना देखिँदैन,” मौसमविद् झाले भने, “अहिलेसम्म हेर्दा भोलि काठमाडौंमा वर्षा हुने देखिँदैन । तर, मौसम हो, विभिन्न प्रणाली विकास हुने र जाने भइरहन्छ । त्यसैले यकिन गरेर भन्न भने सकिँदैन ।”
आज दिउँसो कोसी प्रदेशका केही स्थानहरूमा वर्षा हुँदा मधेस, वाग्मती र गण्डकी प्रदेशका पहाडी भूभागका एकदुई स्थानमा मध्यम वर्षाको सम्भावना रहेको उनले जानकारी दिए ।
बंगालको खाडीमा विकसित भएको चक्रवात ‘मोन्था’का कारण बिहीबारदेखि देशका धेरै स्थानमा मौसम बदली भइ वर्षा भइरहेको छ ।
