काठमाण्डौ । चन्द्रागिरि हिल्स लिमिटेडले हालैको जेन-जी आन्दोलनका क्रममा भएको तोडफोड र आगजनीबाट केबलकारको बटम स्टेशनमा ठूलो क्षति पुगेको जनाएको छ। यद्यपि, कम्पनीले नेपालको पर्यटन प्रवर्द्धन र आर्थिक समृद्धिको आफ्नो पवित्र सपना कायम राख्ने दृढ अठोट व्यक्त गरेको छ।
भदौ २३ गते यता भएको आन्दोलनका क्रममा भएको हिंसात्मक घटनामा ज्यान गुमाएकाहरूप्रति गहिरो दुःख व्यक्त गर्दै चन्द्रागिरि हिल्सले शोक सन्तप्त परिवारजनप्रति समवेदना र घाइतेहरूको शीघ्र स्वास्थ्य लाभको कामना गरेको छ। कम्पनीले आन्दोलनले उठाएका सुशासन, भ्रष्टाचार नियन्त्रण, रोजगारी र आर्थिक समृद्धिका मुद्दाहरूप्रति आफ्नो सम्मान र साझा उद्देश्य रहेको बताएको छ।
चन्द्रागिरि केबलकार, लाखौं शेयरधनीहरूको साझा लगानीमा स्थापित पब्लिक लिमिटेड कम्पनी, नेपालको पर्यटन प्रवर्द्धन, राजस्व वृद्धि, रोजगारी सिर्जना र स्थानीय विकासमा महत्त्वपूर्ण योगदानकर्ता हो। तर, मंगलबार भएको आन्दोलनका क्रममा भएको तोडफोड र आगजनीले केबलकारको बटम स्टेशनमा ठूलो क्षति भएको छ।
“हाम्रो अठोट कमजोर भएको छैन। पर्यटन विकासमार्फत देशको मुहार फेर्ने हाम्रो सपना अझै बलियो बनेको छ,” चन्द्रागिरि हिल्स लिमिटेडको विज्ञप्तिमा उल्लेख छ। कम्पनीले आगामी दिनमा सेवा सुचारु गर्न, थप लगानी र रोजगारी सिर्जना गर्न, र गुणस्तरीय सेवा प्रदान गर्न प्रतिबद्ध रहेको जनाएको छ।
कम्पनीले यो कठिन समयमा सहयोग गर्ने सुरक्षाकर्मी, स्थानीय समुदाय र कर्मचारीहरूप्रति हार्दिक आभार व्यक्त गरेको छ। साथै, पर्यटक र दर्शनार्थीहरूलाई परेको असुविधाप्रति क्षमायाचना गर्दै स्थानीय समुदाय र सम्बन्धित निकायसँग थप सहयोग र समन्वयको आग्रह गरेको छ।
चन्द्रागिरि हिल्सले आफ्ना कर्मचारी र ग्राहकवर्गको अपेक्षा अटुट राख्न सक्रिय रहने र छिट्टै नै सेवा पुनः सुचारु गर्ने प्रतिबद्धता जनाएको छ। “हामी पुनः उठ्ने छौँ र देशको पर्यटन प्रवर्द्धनमा अझै समर्पित रहनेछौँ,” विज्ञप्तिमा भनिएको छ।
