शनिबार, जेठ २७, २०८०
काठमाडौं । आज शनिबार हुने सहिद स्मारक ‘ए’ डिभिजन लिग २०७९–८० को अन्तिम खेलमा दर्शकहरूले निःशुल्क प्रवेश पाउने भएका छन् । अखिल नेपाल फुटबल संघ (एन्फा) ले सामाजिक सञ्जालमार्फत आजको साँझ अपरान्ह ५ः३० बजेदेखि सुरु हुने थ्री स्टार र जावलाखेल युथ क्लबबीचको खेलमा दर्शकलाई निशुल्क प्रवेश दिइने जनाएको हो ।
दशरथ रंगशालामा साँझ ५ः३० बजेपछि हुने खेलमा रेलिगेसनको दवाव झेलिरहेको थ्री स्टारलाई जित्नैपर्ने दबाब छ । तालिकाको १३औँ स्थानमा रहेको थ्री स्टारलाई जावलाखेलविरुद्धको जितले मात्र रेलिगेसन क्षेत्रबाट माथि राख्नेछ । हारको नतिजाले थ्री स्टार रेलिगेसनमा पर्नेछ ।
लिगमा २५ खेलबाट ३७ अंक जोडेको जावलाखेलले भने लिगमा चौथो स्थान निश्चित गरिसकेको छ । लिगको अन्तिम चरणको पहिलो दिन आज विभिन्न तीन खेलमा प्रतिस्पर्धा हुँदैछ । जसमा दुई खेल त्रिपुरेश्वरस्थित दशरथ रंगशालामा हुनेछ । एक खेल च्यासल मैदानमा हुनेछ ।
