काठमाडौँ । ‘धोकेबाज हौ तिमी’ पछिल्लो समयको भाइरल गीत हो । गीतको गायिका हुन् एलिना चौहान ।
करिब दुई वर्ष अगाडि सार्वजनिक यो गीत अहिले दोस्रो पटक भाइरल भएको हो ।
गीत भाइरल भएपनि गायिका चौहानको व्यस्तता बढ्नु स्वभाविक हो । स्वदेशका थुप्रै कार्यक्रमपछि उनी अहिले विदेशमा पनि व्यस्त हुन थालेकी छन् । केही अगाडि कार्यक्रममा लागि अष्ट्रेलिया पुगेकी उनको सांगीतिक कार्यक्रमसँगै अष्ट्रेलियामा रहँदै आएका युवक विष्णु सापकोटासँग प्रेमको चर्चा पनि चल्न थालेको छ ।
जुन चर्चालाई उनले एकपछि अर्को गर्दै लगातार बनाएको टिकटक भिडियोले बल पुगेको छ । सापकोटासँग उनले केही दिनयता धेरै टिकटक पोष्ट हालेकी छन् ।
सापकोटासँग उनको भेट गत भदौमै तिजको कार्यक्रमका सिलसिलामा अष्ट्रेलियामै भएको थियो । त्यहीवेलादेखि उनीहरु प्रेममा रहेको बताइन्छ । अष्ट्रेलियामा अहिले हुने उनको कार्यक्रम व्यवस्थापन समेत विष्णुले गरिरहेको बताइन्छ ।
भदौको कार्यक्रमबाट फर्किदा विष्णु पनि उनीसँगै नेपाल आएका थिए । नेपालमा उनीहरुले एउटा युगल गीत समेत गाए ‘बाजा तालमा’ । गीतले चर्चा भने कमाउन सकेन ।
एलिनाले विष्णुसँगको एउटा टिकटक दुबैलाई जोडेर बनाएकी छन् । उक्त भिडियोमा थुप्रैले उनीहरुलाई ‘कपल’ भन्दै बधाई समेत दिएका छन् । विष्णुको टिकटक अकाउन्टमा पनि एलिनासँगको भिडियो बाक्लै भेटिन्छ ।
विष्णुले ‘चाहे चलोस् आँधीबेरी, चाहे चलोस् हुरी, कहिले तिमी मेरो साथ नछाड्नु है लुरी’मा डुयट भिडियो हालेका छन् । जसमा एलिनाले ‘ल ल छाड्दिनँ’ भन्दै कमेन्ट गरेकी छन् ।
टिकटकमा उनीहरुको गतिविधि हेर्दा उनीहरुले गुपचुप प्रेम अगाडि बढाइरहेको सजिलै अनुमान गर्न सकिन्छ ।
