चितवन । चितवनकाे राष्ट्रिय निकुञ्जमा रहेकाे जङ्गली हात्ती रोनाल्डो हात्ती मृत अवस्थामा भेटिएको छ । बरण्डाभार बन क्षेत्रकाे बीसहाजारी पाेष्ट नजिक आज शनिबार बिहान मृत अवस्था भेटिएको हो ।
चितवन राष्ट्रिय निकुञ्ज र यस क्षेत्रमा लामो समयदेखि देखिदै आएको यो जङ्गली हात्ती करेन्ट लागेर मरेको अनुमान गरिएको छ । यद्यपि निकुञ्जले आधिकारिक पुष्टि गर्न बाँकी रहेको छ ।
हात्ती मृत भेटिएको चितवन राष्ट्रिय निकुञ्जकाे र राष्ट्रिय प्रकृति सरक्षण काेषका प्राबिधिक टाेली पुगेर हात्तीकाे मृत्यु बारे अनुषन्धान शुरू गरेका जनाएका छन् ।
साैराहाको हात्ती प्रजनन केन्द्रमा मात्रै यो हात्तीबाट ३३ वटा हात्तीका बच्चाकाे जन्म भएका छन् । सन् २००२ देखि रोनाल्डो हात्ती चितवनमा देखिएको संरक्षण कर्मीहरुले जानकारी दिएका छन् ।
निकुञ्जका पूर्व वन्यजन्तु चिकित्सक डा. विजय श्रेष्ठ हात्तीको मृत्युले सरक्षणका क्षेत्रमा समेत क्षति पुग्ने बताए । रोनाल्डो चितवन राष्ट्रिय निकुञ्जको पूर्वी क्षेत्र विशेषगरी सौराहा र खोरसोर हात्ती प्रजनन तथा तालिम केन्द्र आसपास बस्ने गरेको हात्ती हो । केन्द्रका पोथी हात्तीहरूसँग प्रजनन जगली हात्तीबाट नै हुने गरेकाे छ ।
