काठमाडौं । युनिलिभर नेपाल लिमिटेडले रसुवामा आएको बाढीबाट प्रभावित परिवारका लागि करिब ६ करोड रुपैयाँ बराबरको सहयोग गरेको छ ।
कम्पनीले राहत तथा पुनर्स्थापना कार्यमा सहयोग पुर्याउने उद्देश्यले प्रधानमन्त्री दैवी प्रकोप उद्धार कोषमा ५ करोड रुपैयाँ योगदान गरेको जनाएको छ । साथै, करिब १ करोड रुपैयाँ मूल्य बराबरका २६ टन दैनिक अत्यावश्यक स्वास्थ्य तथा सरसफाइ सामग्री समेत उपलब्ध गराएको छ ।
युनिलिभर नेपालका प्रबन्ध निर्देशक अम्लान मुखर्जीले विपद्को कठिन समयमा सबै एकजुट भएर प्रभावित समुदायको साथमा उभिनुपर्ने बताए ।
उनले नेपालले चुनौतीपूर्ण परिस्थितिमा धैर्यता र सहनशीलता देखाउँदै आएको उल्लेख गर्दै राहत प्रयासमा सहयोग पुर्याउने र प्रभावित परिवारलाई पुनर्स्थापनाको यात्रामा साथ दिने प्रतिबद्धता व्यक्त गरे ।
युनिलिभर नेपालले स्वास्थ्य, सरसफाइ तथा सामाजिक कल्याणमा केन्द्रित पहलमार्फत समुदायलाई सहयोग गर्दै आएको जनाएको छ । कम्पनीले पछिल्लो सहयोगले बाढी प्रभावित समुदायलाई राहत पुर्याउनुका साथै विपद्को सामना गर्न सामूहिक प्रयासलाई थप बल पुग्ने विश्वास व्यक्त गरेको छ ।
