काठमाडौं । हिमालयन एभरेष्ट इन्स्योरेन्स लिमिटेड र कम्पनीमा कार्यरत कर्मचारीहरूले रसुवाको भोटेकोशी बाढीपहिरो प्रभावितको उद्धार तथा राहतका लागि ३३ लाख ५३ हजार १८ रुपैयाँ आर्थिक सहयोग गरेका छन् ।
कम्पनीले संस्थागत सामाजिक उत्तरदायित्वअन्तर्गत २५ लाख रुपैयाँ र कर्मचारीहरूले आफ्नो एक दिनको तलबबाट संकलन गरेको ८ लाख ५३ हजार १८ रुपैयाँ गरी कुल ३३ लाख ५३ हजार १८ रुपैयाँ प्रधानमन्त्री दैवीप्रकोप उद्धार कोषमा जम्मा गरेको हो ।
भदौ १० गते बिहान रसुवाको भोटेकोशीमा आएको बाढीबाट प्रभावित नागरिक तथा समुदायप्रति ऐक्यबद्धता जनाउँदै उक्त सहयोग गरिएको कम्पनीले जनाएको छ ।
कम्पनीका प्रमुख सञ्चालन अधिकृत राजकुमार खड्काले बीमा कम्पनीको भूमिका जोखिम हस्तान्तरण र वित्तीय सुरक्षामा मात्र सीमित नरहेको बताए । समुदायप्रतिको जिम्मेवारी निर्वाह गर्नु पनि संस्थागत दायित्वको अभिन्न हिस्सा रहेको उनको भनाइ छ ।
कम्पनीले सहयोगले विपद्बाट प्रभावित परिवारलाई तत्काल राहत उपलब्ध गराउन तथा पुनर्स्थापनामा सरकारलाई सहयोग पुग्ने विश्वास व्यक्त गरेको छ ।
हिमालयन एभरेष्ट इन्स्योरेन्सले आगामी दिनमा पनि आवश्यकता र सम्भाव्यताका आधारमा प्रभावित समुदायको राहत तथा पुनर्स्थापनासँग सम्बन्धित पहलमा सहकार्यलाई निरन्तरता दिने प्रतिबद्धता जनाएको छ ।
