काठमाडौं उपत्यका मेयर्स फोरमले फोहोर व्यवस्थापनलगायत समसामयिक विषयमा प्रधानमन्त्री बालेन्द्र साहसँग छलफल गर्ने भएको छ ।
मंगलबार बसेको फोरमको आकस्मिक बैठकले प्रधानमन्त्रीसँग तत्काल भेटेर उपत्यकाको फोहोर व्यवस्थापनसहित विभिन्न विषयमा ध्यानाकर्षण गराउने निर्णय गरेको हो ।
फोरमका अध्यक्ष तथा ललितपुर महानगरपालिकाका मेयर चिरिबाबु महर्जनले जतिसक्दो छिटो प्रधानमन्त्रीसँग भेटघाटको समय माग्ने निर्णय भएको जानकारी दिए ।
उनका अनुसार भेटमा उपत्यकाको फोहोर व्यवस्थापन, सडक बत्तीको शुल्क व्यवस्थापन, स्थानीय तहले प्रयोग गरिरहेका जग्गाको भोगाधिकार तथा फोहोर व्यवस्थापनका लागि आवश्यक जग्गा व्यवस्थापनका विषयमा प्रधानमन्त्रीको ध्यानाकर्षण गराइनेछ ।
फोरमले तत्कालीन सरकार र नेपवेस्टबीच भएको फोहोर व्यवस्थापनसम्बन्धी सम्झौता कार्यान्वयन गर्ने वा सम्झौता खारेज गरी वैकल्पिक मार्ग खोल्ने विषयमा समेत निर्णय गर्न प्रधानमन्त्रीसँग आग्रह गर्ने भएको छ ।
उपत्यकाको फोहोर व्यवस्थापन तीनै तहका सरकारको साझा सरोकारको विषय भएकाले यसको दीर्घकालीन समाधानका लागि स्थानीय सरकार प्रतिबद्ध रहेको अध्यक्ष महर्जनले बताए ।
यसैगरी, भदौ ५ गते सिंहदरबारमा भएको फोहोर व्यवस्थापनसम्बन्धी बैठकमा फोरमका पदाधिकारी तथा सदस्यहरूमाथि सांसद आशिका तामाङबाट भएको व्यवहारप्रति समेत फोरमले आपत्ति जनाएको छ । प्रधानमन्त्रीसँगको भेटमा उक्त विषयसमेत उठाउने निर्णय भएको महर्जनले जानकारी दिए ।
‘मेयर्स फोरमको आकस्मिक बैठकले प्रधानमन्त्री बालेन्द्र साहलाई भेटेर फोहोर व्यवस्थापनलगायत समसामयिक विषय अवगत गराउने निर्णय गरेको छ,’ महर्जनले भने ।
यसैबीच, उपत्यकाको फोहोर विसर्जन हुँदै आएको बञ्चरेडाँडाका स्थानीयले आफ्ना माग १५ दिनभित्र पूरा नगरे फोहोर विसर्जनमा रोक लगाउने चेतावनी दिएका छन् । स्थानीयले फोहोर रोक्ने चेतावनी दिएपछि फोरमले समस्या समाधानका लागि प्रधानमन्त्रीसँग छलफल गर्न लागेको हो ।
