काठमाडौं । निरन्तरको वर्षापछि कोसी नदीमा पानीको बहाव २ लाख क्युसेक नाघेको छ। आइतबार बिहान ८ बजे १ लाख ७६ हजार ३०५ क्युसेक रहेको बहाव दिउँसो ४ बजेसम्म बढेर २ लाख ९ हजार ८४० क्युसेक पुगेको हो।
जिल्ला प्रहरी कार्यालय सप्तरीका प्रवक्ता डीएसपी हेमराज घिमिरेका अनुसार पानीको बहाव बढेसँगै कोसी ब्यारेजका ५६ मध्ये २८ वटा ढोका खोलिएको छ। दिउँसो ३ बजेसम्म बहाव १ लाख ९० हजार ३९० क्युसेक मापन गरिएको थियो।
पानीको बहाव खतराको तह नजिक पुगेपछि कोसी ब्यारेजमा चेतावनीस्वरूप रातो झण्डा र रातो बत्ती बालिएको छ। प्रशासनले नदी आसपासका बासिन्दालाई उच्च सतर्कता अपनाउन, सुरक्षित स्थानमा रहन तथा अनावश्यक रूपमा नदी किनारमा नजान आग्रह गरेको छ।
