काठमाडौं । प्रिमियर इन्टरनेसनल स्कुलमा ‘अन्वेषण २०२५’ सम्पन्न भएको छ । विज्ञान–प्रविधि प्रदर्शनीमा कक्षा ६ देखि ९ का विद्यार्थीहरूले तयार पारेका ३५ भन्दा बढी परियोजनामा सिर्जनात्मकता र प्रविधि–सीपको प्रदर्शनी गरिएको थियो ।
साधारण तथा जटिल मेसिन, ऊर्जा रूपान्तरण तथा प्रणालीसम्बन्धी अनुसन्धानलगायतका प्रदर्शनीले विद्यार्थीलाई आलोचनात्मक सोच, उद्देश्यपूर्ण डिजाइन र वास्तविक समस्या समाधानतर्फ बाटो देखाएको स्कुलले जनाएको छ ।
विद्यार्थीहरूले स्वचालित प्रणालीदेखि दिगो प्रविधिसम्मका थुप्रै नमुना प्रस्तुत गरेका थिए । स्वचालित पानी झार्ने यन्त्र, हाइड्रोलिक ब्रेक प्रणाली, हातका इशाराले चल्ने कृत्रिम हात, आपतकालीन अवस्थामा टाढाबाट चलाइने सानो सवारी, स्मार्ट सडकबत्ती तथा नवीकरणीय ऊर्जाका नमुना प्रदर्शनीमा राखिएका थिए ।
कार्यक्रमका विशेष अतिथि हिप्को इन्फ्राका निर्देशक तथा द लिफ रिसोर्टका संस्थापक हितेश गोल्छाले विद्यार्थीको आत्मविश्वास, सिर्जनात्मकता र प्रविधि–बुझाइबाट आफू अत्यन्त प्रभावित भएको बताए । उमेरले साना विद्यार्थीले गरेको कामको स्तर असाधारण रहेको उल्लेख गर्दै उनले उत्कृष्ट समूहलाई उपहारसमेत प्रदान गरे ।
